...hamingjan heldur áfram að blómstra og allt er yndislegt! :)

Um daginn fór ég í sólbað, hef ekki gert það í mörg ár og í alvörunni náði ég smá lit. Kannski finnst ykkur það ekkert merkilegt en fyrir hina skjannahvítu mig sem hefur ekki verið sólbrún síðan 1995 er þetta nokkuð mikið afrek. En sólin fékk ofbirtu í augun af mér og hefur ekki látið sjá sig síðan. Vona að hún jafni sig því ég verð að venja húðina aðeins við áður en ég fer til Grikklands.

Undanfarnir dagar hafa verið góðir með tíðum Egilstaðaferðum, nýr kjóll prýðir safnið mitt og rauður varalitur hefur það gott í veskinu mínu. Ég sá líka gamla vinkonu í gær sem leit svo vel út að ég bara gapti og ég samgleðst henni svo innilega. Hún hefur veitt mér innblástur í að losna við þessi fáu aukakíló sem "fegra" líkamann minn, þetta er greinilega hægt og kannski ekkert svo erfitt ef maður er bara ákveðinn og duglegur.

Það var partý í gær og við Dawid fórum en vorum gamla stillta fólkið sem fór heim fyrir miðnætti. Notalegt svona stundum þó ég sé mikið partýljón eins og allir sem mig þekkja vita. Enda þýðir ekkert að vera þreyttur í dag þegar sjómannadagshófið er. Matur, skemmtiatriði, spjall, drykkja og dans fram á rauðan morgunn.

Er að hlaða myndavélina svo ég geti losað hana fyrir kvöldið og ef það eru einhverja fínar myndir af fína og flotta kærastanum mínum getur bara vel verið að ég skelli einni inn, þið verðið nú að fá að sjá gripinn er það ekki?

Já lífið er yndislegt, var ég búin að segja ykkur það...

...lífið er eitthvað svo yndislegt þessa dagana. Ég er svo hamingjusöm og dagarnir bara fljúga áfram. Ég er eitthvað svo sátt við allt og alla og elska allt, blóm og brum, vini og vandamenn, sólina og skýin. Samt hef ég ekkert verið að gera neitt sérstakt af mér. Held bara að þetta hrikalega þunglyndi og kvíði sem hefur hrjáð mig í alltof mörg ár sé loksins að sleppa takinu aðeins af mér og leyfa mér að vera ég sjálf...og ég er svo glöð! Fyrir ári síðan hefði ég td ekki tekið að mér jafn krefjandi hlutverk eins og að vera með í leikriti og ég verð að viðurkenna að stundum þurfti ég aðeins að strita til að komast af stað á æfingar en vá hvað þetta hefur gefið mér mikið. Svo er það yogað sem ég ætla að vona að haldi áfram næsta haust og mínir yndislegu vinir hérna sem eru alltaf svo hressir og kátir og góðir og glaðværir og jákvæðir og skemmtilegir. Vinir mínir fyrir sunnan eru alls ekkert verri en allt er í svo miklu meiri skorðum fyrir sunnan, allt svo langt og erfitt og ég er bara komin með leið á því. Hlakka samt alveg voðalega til að kíkja suður í júní, ekki gaman að taka saman dótið en ég er sátt við ákvörðunina að vera á Seyðisfirði í vetur, rækta nýja sambandið mitt og heilsuna og þjálfa heilann aðeins með fjarnámi og ef allt gengur eins og í sögu ætla ég meira að segja að byrja að vinna! :) Ég hlakka til að kíkja á smá pöbbarölt, hitta góða vini (vonandi sem flesta), fara á Madonna og bara aðeins að túristast og sjá borgina með augunum hans Dawids sem hefur bara verið í Rvk eina nótt. Svo er það þetta yndislega sumar sem er alveg að verða tilbúið, allt að springa út og hitatölurnar að hækka. Það þýðir bara að það styttist í road-trip um Ísland með vel völdu fólki, ferð til Danmerkur og svo síðast en ekki síst 3ja vikna ferð til Grikklands þar sem ég verð algjörlega mállaus útlendingur því ég tala víst hvorki pólsku né grísku. OMG ég verð að þegja í 3 vikur og vera prúð og kinka kolli og brosa og koma vel fyrir...

...margt og mikið gerst síðan síðast. Nokkrir skreppitúrar til Egilsstaða, þrotlausar æfingar fyrir leikritið, Dawid er orðinn stoltur Fjarðarbakkabúi, flutti stuttu eftir síðasta blogg og svo auðvitað frumsýningin. Já frumsýningin var alveg frábær og bara dagurinn allur sem byrjaði á generalprufu klukkan 13 svo það þurfti að mæta klukkan 11 í smink og hárgreiðslu. Svo var generalprufan sem eldriborgurum var boðið á og gekk hún alveg hæfilega brösulega, amk nóg til að allir væru sáttir því það þýðir víst að frumsýningin gangi vel. Eftir þetta skelltum við okkur í sund, pottana og gufu og enduðum sundferðina á að leika okkur með sundbolta, stelpur á móti strákum. Svo var slökunarjóga með Unni Óskars og að því loknu var bara kominn tími á að borða smá og fara aftur í smink. Snorri var mjög sáttur við daginn og sagðist aldrei hafa verið með svona rólegan frumsýningarhóp.

Frumsýning sjálf gekk alveg frábærlega, góð mæting, ekkert klúður sem talandi er um, salurinn frábær og krafturinn með ólíkindum. Eftir sýninguna þegar við fengum að tala við fólkið okkar byrjaði ég að skjálfa og fór næstum því að grenja, smá svona eftir taugakast eða hvað maður á að kalla þetta. Auðvitað var skálað í kampavíni á eftir og svo elduðu Maggi og Lilja lasagna og kjúklingakássu handa okkur öllum, að lokum var sungið og trallað og drukkið og hlegið og svo farið á Láruna þar sem gleðin hélt áfram fram á morgun. Það skemmdi ekkert fyrir gleðinni hvað fólk var duglegt að koma og þakka okkur fyrir og hrósa okkur og handritinu, þetta var bara eilíf sæluvíma. Ég ákvað svo að vera ekkert að fara í eftirpartý þó mig langaði því ég sá ekki fram á að nenna að labba heim og svo mátti ekki gleyma að önnur sýning var strax næsta kvöld. Hún gekk nú bara vonum framar, fólk ekkert mjög sjúskað og salurinn góður þó það væru fáir. Það vill nenfilega oft vera þannig að önnur sýning er léleg og mjög fáir mæta svo við vorum bara nokkuð sátt.

Það var mjög skrítið að fá svo tveggja daga frí, bara hvergi sem maður þurfti að vera allt kvöldið. Hvað átti maður að gera? Horfa á sjónvarpið vera með ástvinum? Eða fá flensu? Jú það síðasta varð fyrir valinu. Ekkert alvarlegt samt, er bara hrikalega tussuleg og hósta heilan helling. Tek bara hósatasaft og panodil fyrir sýninguna í kvöld því ég verð að standa mig alveg extra vel í kvöld því foreldrar mínir koma að berja mig augum. Svo á föstudaginn er lokasýning og þá ætlar Dawid að mæta aftur og taka myndir, gaman að eiga myndir af þessari lífsreynslu. Svo er þessari törn bara lokið en hver veit hvort maður verði með á næsta ári...

...svolítill tími liðinn síðan síðast en ég er samt ekki hætt, ó sei sei nei!

Skellti mér til Akureyra á laugardaginn fyrir páska með Dawid og fjölskyldunni hans. Skrapp í búðir og fékk mér að borða, sendum svo fjölskylduna heim því við áttum bókað herbergi. Byrjuðum á því að leggja okkur og gera okkur svo fín fyrir kvöldmatinn. Ég borðaði himneska nautasteik sem bráðnaði í munninum og drakk alveg hrikalega gott rauðvín með. Svo fórum við í göngutúr og á kaffihús og svo í bíó á 10.000BC. Mjög skemmtileg mynd en fólkinu í kringum okkur hefur örugglega ekkert haft gaman að því þegar ég var að þýða fyrir Dawid þegar fólkið var að tala einhverja fornísku og auðvitað bara íslenskur texti. Svo röltum við aðeins meira um bæinn, ætluðum á kaffihús aftur en nenntum því ekki og fórum heim að sofa. Sváfum eins lengi og við gátum morguninn eftir og fórum svo á Bautann og borðuðum alveg hrikalega góðan mexíkó hamborgara, svo var rúntað um og Akureyri skoðuð áður en var tími til að halda aftur heim. Hefði verið gaman að vera aðra nótt en það er líka gott að fara þegar er gaman svo ferðin verði eftirminnileg.

Þegar heim var komið var hamast við að byrja á páskaeggjum og svo drukkinn smá bjór og farið á Láruna. Gat nú ekki látið heila helgi líða án þess að koma við þar. Það endaði með mega fyllerí hjá öllum og smá misskilningi hjá sumum en allt fór sem betur fer á besta veg að lokum. Sumt fólk tekur bara eðlilegum samskiptum aðeins of alvarlega!!

Eftir páska varð ég svo veik...í 10 daga held ég. Lá bara alveg flöt, bruddi verkjapillur, drakk eplasafa of svaf. Allt sem ég gerði meiddi mig, meira að segja að ganga í joggingbuxum. Þetta voru ekki skemmtilegustu dagar lífs míns og langt síðan ég hef orðið svona hrikalega lasin. Vonanst til að endurtaka það ekki á næstunni. Tóks að smita mömmu ræfilinn og Gullu mína og þær urðu báðar alveg fárveikar í marga, marga daga.

Svo hafa öll virk kvöld og eftir hádegi um helgar farið í leikæfingar, þetta er allt saman að koma hjá okkur og bráðum verðum við stórstjörnur. Ég sýni að sjálfsögðu mikla hæfileika og stjarna mín á eftir að skína skært á fjölum Herðubreiðar. Ég lofa þeim sem mæta að þeir fá að sjá svolítið sem ekki hefur oft sést!!

Hvað er svo planið næstu daga? Jújú það er að baka pizzu með stelpunum og syngja í singstar, veit ekki hvort það er bæði föst og laug eða bara annað kvöldið. Svo er líka á döfinni að vera ekki drukkin á laugardagskvöld svo við Dawid getum gert eitthvað uppbyggilegt á sunnudaginn eins og að fá okkur brunch á hótel héraði eða farið í sund áður en leikæfingin byrjar. Ef við verðum extra snemma í því ætlum við meira að segja að skreppa í sviðsvinnu hjá leikfélaginu líka. Maðurinn segist vera vanur að mála og setja upp svið svo afhverju ekki að nota hann? Svo þurfum við líka að fara í Bónus ef Dawid fær íbúðina sem hann er að fara að skoða í kvöld, *krossa putta* sem er nú einmitt bara hérna í götunni svo ég get bara skoppað yfir á náttfötunum. Það væri nú gaman, vona að allt gangi vel, hann fái íbúðina og geti flutt sem allra fyrst inn því það er það sem hann dreymir um. Kannski ekki gaman að búa í marga mánuði hjá stóru systur og hennar familí.

En jæja þá er komið að mér að fara í bað og borða kvöldmat, alltaf gaman að þessu. Læt ykkur Reykvíkingana svo vita þegar leið mín liggur næst á suð-vestur hornið. Það verður samt kannski ekki fyrr en í júní því það er svo hrikalega mikið að gera hérna í firðinum, leikfélagsæfingar og svo sýningar, sumarbústaður og sjómannadagshelgi svo eitthvað sé nefnt fyrir utan þetta venjulega útstáelsi...

...nei það er ekki netlaust í firðinum fagra en alveg nóg að stússast. Hef gert ýmislegt síðan síðasta færsla var skrifuð. Skrapp auðvitað í borgina og stoppaði í viku, fór á djammið með Herdísi þar og auðvitað var það alveg hrikalega skemmtilegt. Fór líka í bíó og út að borða og allt þetta sem maður gerir í borginni, já og versla ég verslaði smá, en bara pínu ég lofa. Fór svo heim degi fyrr en áætlað var því elsku amma mín fékk heilablóðfall. Við tóku nokkrir erfiðir dagar þar sem fjölskyldan varði að mestu leiti við rúmið hennar á sjúkrahúsinu. Sunnudaginn 24. febrúar lést hún svo á rólegan og kvalarlausan hátt. Við tók mikil sorg hjá öllum og erfiður tími þar sem amma var höfuð og herðar í fjölskyldunni. Laugardaginn 1.mars var hún svo jarðsungin og eftir það var smá kaffi fyrir fjölskylduna og nánustu vini. Núna er mesta sorgin horfin en við tók mikill söknuður sem á eftir að vera í hjartanu um lengri tíma.

Ég hef verið dugleg að stunda yoga hérna á Seyðisfirði og svo höfum við pabbi byrjað að fá okkur einstaka morgunagöngur þegar hann er í landi. Ég ákvað líka að vera með í leikfélaginu og fékk hlutverk svo nú taka við þrotlausar æfingar sem taka upp flest völd þar til í byrjun maí. Mjög spennandi ef ég segji sjálf frá, vona bara að það verði mætt vel á sýningarnar. Svo er ég kannski að fara í 1 til 2 daga til Akureyrar um páskana. Bara svona að sýna mig og sjá aðra, skreppa kannski í bíó og keilu og eitthvað svoleiðis ef tíminn leyfir. Og svo þarf ég sennilega að koma til borgarinnar eina helgi í apríl en það fer allt eftir hvernig gengur að æfa leikritið þó ég sé búin að fá leyfi frá leikstjóranum ef ég lofa að fara bara ekki síðustu vikuna fyrir frumsýningu.

Fleira hefur gerst sem hefur breytt lífi mínu á stóran hátt því við Gunnar ákváðum að hætta saman eftir rétt rúmlega 3ja ára samband. Það var gert í mesta vinskap og höfum við oftsinnis rætt saman í símann frá því að þetta gerðist og planað að fara saman í leikhús þegar ég get stoppað aðeins lengur í borginni en 2 daga. Auðvitað er þetta skrítið en ég hef það sterkelega á tilfinningunni að við eigum eftir að vera góðir vinir um aldur og ævi.

Planið eftir páska er svo að byrja í ræktinni, verð nú að fara að vinna í að losna við þessi kíló sem eru eftir og virðast öll sitja á mallakútnum mínum. en fyrst er það eitt stykki páskaegg og með því...

...jæja alltaf jafn mikið fjör á Seyðis, amk um helgar á virkum dögum líður lífið áfram á sínum vanjulega hraða en um helgar er allt gefið í og þær líða alltof hratt. Síðustu helgi var mikið gaman hjá okkur stelpunum, spiluðum við kertaljíos og rómantík í rafmagnsleysinu, fengum okkur smá í glas, dönsuðum við norðmenn, pólverja og íslendinga, erum svo fjölþjóðleg hérna í firðinum, og heilmikið spjallað og hlegið. Ég datt tvisvar sinnum á hausinn um helgina, fyrra skiptið var ég búin að staulast alla leiðina heim í fljúgandi hálku en datt kylliflöt í bílastæðinu hérna og vissi af mér næst liggjandi hálf undir bíl!! Seinna skiptið var ég í brjálaðri sveiflu með Sævari heiðargæs, á sokkunum á parketlögðu gólfi að dansa við Johnny Cash. Ákaflega skemmtilegt og fjörugt þangað til hann sveiflaði mér eitthvað útí horn og ég bara í gólfið.

Næstu helgi verður svo daman í borginni. Jájá ekkert orðin svo mikil landsbyggðarbomsa að ég geti ekki skellt mér í borgina. Legg af stað keyrandi með Gunnsa, Lillu og Óla frænda eldsnemma á föstudagsmorgun og ætla að stoppa í svona viku. Ekki ennþá ákveðið hvort ég keyri með þeim austur aftur eða tek svona fljúgivél. Það hljómar reyndar betur því það er ekki svo gaman að sitja í bíl lengi en ég læt flugfelag.is ráða þessu, þe. hvernig verð þeir bjóða mér þegar ég þarf á því að halda.

Sem sagt allt í gúddí hérna bara, við heyrumst...

...ég er bara ennþá á Seyðisfirði í öllum snjónum, já það snjóar svoleiðis að maður hverfur aftur í tímann og fer að hugsa um alla góðu veturna sem maður átti sem barn. Ég auðvitað mætti á þorrablótið, hló og skíkti, dansaði og dillaði, drakk og...og...og...drakk! ;) Skemmti mér alveg ferlega vel, fattaði flest öll skemmtiatriðin og hitti fullt af góðu fólki og fékk að taka snúning með pabba og Geira frænda.

Annars líða dagarnir á Seyðisfirði bara áfram í einni rólegri heild, ég er dugleg að heimsækja ættmenni og er byrjuð í yoga og finn mér vonandi eitthvað meira að gera. Svo er ég búin að eignast aðdáanda og það er auðvitað kitlandi skemmtilegt svona í hversdagsleikanum. Láran var svo heimsótt á laugardagskvöldið í skemmtilega veðrinu sem var þá, þar var slatti af góðu fólki og það var voðalega gaman. Ég plöggaði svo partý, labbaði þangað, klæddi mig úr yfirhöfninni, labbaði upp, settist í sófann, stóð strax upp aftur, labbaði niður, klæddi mig í og labbaði heim. Ekki að það hafi verið leiðinlegt þar heldur fannst mér allt í einu bara vera kominn tími á að koma sér heim á leið. Já get einstaka sinnum haft vit fyrir sjálfri mér...

...jæja ekkert verið skrifað síðan um jól, já það er orðið svolítið langt síðan! Er auðvitað komin aftur í borgina og búin að vera í rúma 10 daga. Fyrstu dagarnir voru erfiðir, ég saknaði ættingja og vina fyrir austan og bara tilfinningarinnar sem ég fæ þegar ég er þar. En auðvitað var ég rosalega ánægð með að hitta Gunnarinn minn þó ég væri kannski ekki ein sdugleg að sína það til að byrja með og ég hefði átt að vera. Þannig að lífið hefur verið rólegt síðan ég kom, sofið mikið og kúrt en skrapp aðeins út um helgina. Kle bauð upp á rauðvín og Tia Maria kaffi á föstudagskvöldið og svo labbaði ég í bæinn ig beint heim aftur á laugardagskvöldið. Rosalega dugleg þessa helgi eða þannig en það var bara fínt og gott og gaman. En núna verð ég að koma með tilkynningu!!! Ég = einkabarn = uppáhaldsbarn er að fara á Þorrablótið á Seyðisfirði! :) Fer austur á laugardaginn en veit ekki hvað ég stoppa lengi. Við Gunnar vorum að ræða þetta og ef mér líður betur fyrir austan akkúrat núna þá ætti ég bara að vera þar aðeins, docsanum finnst þetta sniðugt líka en vill fá mig eitthvað suður og ef það verður af þessu þá sækir hún um styrk handa mér til að fljúga suður nokkrum sinnum, amk einu sinni í mánuði. Svo kannski verð ég komin með nóg af Sey eftir 1 mánuð og þá kem ég bara heim aftur í faðminn hans Gunnars en ef ekki ætlum við að hjálpast að við að borga far handa honum í heimsókn til mín. Hvernig lýst liðinu á þetta hjá okkur? Við erum ekkert að rífast eða hætta saman eða neitt þannig, allt gert til að andlega heilsan fari bara upp, upp, upp og hætta að vera í svona miklum bylgjum út og suður. Ég er að minnsta kosti spennt að vera að fara austur en er voðalega leið í hjartanu að vera að skilja Gunnar eftir svona lengi og fá ekkert knús og enga kossa og hafa engan að leiða eða röfla í nema í gegnum símann. En það eru kostir og gallar við allt og ekkert er alveg fullkomið en ég veit að við munum alveg lifa þetta af, sérstakelga ef við fáum að sjást 2 sinnum í mánuði...

...þó það séu jól get ég bara ekki sofið út! Þurfti að neyða sjálfa mig til að sofa til 9 í morgun. Þetta er auðvitað ekki hægt og ætti að vera bannað.
Auðvitað var aðfangadagur yndislegur. Bar út kort og pakka, fór í jólagraut, bar út kort með Gyðu, slappaði af, var illt í maganum, sofnaði aðeins, borðai besta jólamatinn, opnaði frábærar gjafir og fékk hele föðurfjölskylduna í heimsókn. Allt eins og það átti að vera fyrir utan magakrampana en það er nú ok fyrst allt hitt var í lagi. Fékk 1 bók í jólagjöf, pasmínusjal, smá glingur, 2x litla care bears, Georg Jensen jólaskraut, tösku, tölvuleik, dvd mynd, bók með myndum af mér og vinum mínum, sokka, inninskó og peninga. Svo á ég 2 pakka í borginni og svo fengum við Gunnar Soda Stream-vél saman frá tengdó. Eins og þið sjáið get ég ekki kvartað yfir þessu, óvenjumargar gjafir og allar voðalega góðar! :) Svo var árlegt jólaboð hjá Lillu og Gunnsa í gær og ég borðaði helling af heitri aspas-rúllu, meina fæ bara svoleiðis einu sinni á ári. Fór svo heim og lagði mig til...11 um kvöldið...ahhhh gott að lúlla. Smá jólarúntur með Gyðu og Klemensi og svo bara að kveðja Gyðuna sem er á leiðinni aftur til Danmerkur að hitta ástina sína einu og fara í skóla. Í dag hefur verið afslöppun en ekkert lúll, skrapp til ömmu og hef svo bara hangsað yfir tölvuspili og sjónvarpi. Er samt hætt að hafa þolinmæði í að glápa mikið á sjónvarpið en hver veit kannski lagast það þegar við fáum loksins útsendingu í kjallarann okkar. En samt, er það eitthvað sem maður vill að lagist? Í kvöld koma svo amma og Óli að borða hjá okkur og svo er bara bjór og gaman í alla nótt. Annar í jólum er löglegur djammdagur, held meira að segja að það standi í nýja dagatalinu mínu frá Glitni...


...þessi fór í dag og verður sárt saknað en næ vonandi að hitta hana þó það verði ekki nema einn dagur næsta sumar...



...þessi á afmæli í dag og hennar og familíunnar er líka sárt saknað og maður finnur mest fyrir því á svona stundum en í sumar fæ ég kannski að hitta þau öll... :)

...komin í fjörðinn fyrir löngu síðan, já vikan bara þotin hjá og ég alltaf að bralla eitthvað með foreldrunum. Reyni að vakna snemma en legg mig líka oft eftir hádegið, er svo kósí svona á meltunni þið skiljið. Allt skraut komið á sinn stað, var að enda við að skreyta jólatréið og hengja upp bjöllur og svona dótarí sem var eftir. Foreldrarnir komu ekki seríunni á tréið þannig að bjútíblundurinn styttist aðeins svo ég veit ekki hvort ég verð nógu sæt í kvöld. Er sko boðið í samsæti hjá Klemensi með gamla hópnum, svo er annað samsæti hjá Hersdísi og ég kíkji þangað ef sá gállinn er á mér. Annars var síðasta helgi alveg ágæt bara eða meira en það ef satt skal segja. Jólahlaðborð á Skaftfelli með mömmu og pabba á föstudagskvöldinu þar sem maður þurfti að passa sig á að taka lítið af öllu og það var samt of mikið!! Svo heim að spjalla við Guðlaugu og svo á Láruna að hitta Ívar og fleira skemmtilegt fólk sem fylgdi með í "partý" hjá Óla Mundu. Á laugardaginn var svo pizza hjá Örnu "litlu", bjór og spil og spjall og hlátur og gaman, glens og grín. Svo heyri ég auðvitað í Gunnarnum mínum á hvernjum degi, þurfti aðeins að skamma hann um daginn en venjulega er ég voðalega blíð og góð eins og mín er von og vísa þarf bara stundum aðeins að hvessa röddina svo það sé hlustað á mig. Ekki alltaf nóg að tala bara hátt! En Gúa Jóna tilnenfdi mig víst til að segja 7 staðreyndir um mig svo hérna koma þær:

1. Ég græt af gleði og sorg, gamani og alvöru, teiknimyndum, Sci-Fi og hryllingsmyndum. Þetta er stundum svolítið vandamál en ég er að reyna að sætta mig við þetta "vandamál".
2. Er lík ketti að því leiti að ég get sofið 16 tíma á sólarhring.
3. Get sitið allan daginn ein heima án þess að kveikja á útvarpi eða hlusta á tónlist, þögn er svo afslappandi fyrir svona ofvirkan hug eins og ég hef.
4. Er eyrnalokka sjúk, helst nógu mikið glingur. Á mjöööög stóra hrúgu.
5. Er alltaf að heyra að ég tali bæði hátt og mikið svo það er víst staðreynd líka.
6. Ég get farið út eins og ég stend ef ég þarf þess, ómáluð í arababuxum með skítugt hár og svitalykt. Ekki fallegt en satt, fer þó yfir leitt ekki langt, bara að kaupa mér eitthvað að éta.
7. Svara oft ekki í símann í marga daga og allir fara að fá áhyggjur og lesa inn á talhólfið og hringja í Gunnar. Erfitt en stundum þarf maður bara pásu!

Sko 7 staðreyndir um mig svo allir ættu að vera ánægðir! :) Ég prófa að tilnefna einhverja og vona að þetta haldi aðeins áfram, er svo forvitin! Tilnefni Gyðu, Skytturnar 3 (þær ráða sjálfar hvort þær gera þetta allar eða bara ein þeirra) og Klemens. Keep up the good work...

...þá eru flest allt komið ofan í tösku...rnar sem ég tek með mér austur. Vátsí mikið af drasli en ég má það því það eru jól og ég ætla að stoppa svo lengi. Ég hef lengi reynt að vanda mig við að taka lítið með mér sem hefur sjaldan tekist alveg en núna ákvað ég bara að sleppa mér alveg og bara tróð öllu sem mig lysti niður. Allar gjafir líka komnar í hús, en þær eru svo margar að ég þarf að senda kassa með póstinum! Var reyndar að versla fyrir mömmu og pabba líka svo það er ekki bara að ég sé að fara yfir um í gjafakaupum. Svo var kvöldkaffi hjá tengdó, hún útbjó að sjálfsögðu mat fyrir að minnsta kosti 15 manns en við vorum bara 6 sko og svo var hún alveg standandi hissa á öllum afgangum!! Brunað í bíó eftir það að sjá Beowulf í þrívídd, rosalega flott og mikil upplifun og ekki laust við að manni brigði nokkrum sinnum, sérstaklega þegar spjóti var skyndilega otað alveg upp í andlitið á manni. Ég hafði persónulega aldrei farið í svona 3-D bíó áður svo ég var voðalega glöð og ánægð og ekki sakaði að sagan var ekkert leiðinleg heldur, varla dauður punktur þar á ferðinni. Svo það er búin að vera alveg þétt pökkuð dagskrá í dag og morgundagurinn verður eitthvað svipaður. Klipping í fyrramálið, svo að kaupa límband og heim að pakka inn 2 stk gjöfum, út aftur og senda gjafirnar, láta laga myndaalbúmið í tölvunni minni og kaupa mér krem og svo bara *vússssss í 1 klst* og ég bara komin á héraðið og svo *brummmmm* í 20-30 mín og ég bara komin heim á ættaróðalið í faðm fjölskyldunnar. Þetta er ekkert leiðinlegt plan sko...

...alltaf er ég að skirfa á nóttunum. Svaf í allan dag því ég fór á djammið með Herdísi og félögum á laugardaginn. Svo þegar ég vaknaði loksins var ég alveg frá í maganum og sat leeeengi á klóinu með dagblað og fór svo aftur að kúra mig. Var meira að segja svo slöpp að ég kveikti ekki á dvd í tölvunni svo þetta hefur verið frekar slæmt. Föstudagskvöldinu var varið í rólegheit, verslað smá í Smáralind, lesið hann/hún og Cosmo og svo bara í rúmið. Ætlaði nú heldur ekkert út á laugardaginn en eftir fegurðarblundinn sem ég tók um kvöldið var ég bara í einhverju stuði til að sýna mig og sjá aðra. Ég skellti líka jóladúkum á sjónvapsbekkinn og stofuborðið, setti upp jólatréð, gerði aðventudstjaka og kveikti á aðventuljósinu svo nú er voða jóló hjá okkur. Keypti líka jólahafra/geitur í Söstrene Grene, 3 stærðir og kostaði samtals um 1000 kallinn. Mjög billegt og skemmtilegt! :) Ég er að minnsta kosti sátt við mitt, langar auðvitað að hafa allt undirlagt í jólakskrauti en íbúðin ber það sem komið er alveg ágætlega. Ahhhh gleymdi skreytti líka kaktusinn með rauðu pakkabandi og litlu gullskrauti sem amma gaf mér, hengdi afganginn út í glugga...

...jæja var aðeins að taka til á blogginu mínu, setja myndir og svona og er bara nokkuð ánægð? Hvað finnst ykkur um þetta? Lagaði linkana fyrir svolitlu síðan og svo bæti ég myspacinu inn þegar það verður tilbúið, er alls ekki notendavænt forrit!!! Er orðin dauðþreytt enda klukkan orðin rúmlega 3! Þetta er samt búið að vera notalegt kvöld, fyrst hittingur og rúntur með Herdísi, svo langt spjall við mömmu og pabba og svo að lokum tölvudund og spjall við Gunnar og undir hljómuðu jólalög. Er búin að hlusta á 108 jólalög í kvöld!

Svo er það mynd af dísinni minni góðu...

Herdísin mín góða passar upp á lúkkið, er hún ekki sassy?

...helgin var í rólegri kantinum, dvd og nammi og snemma að sofa. Það var ákaflega gott og þarft og ég er fegin að enginn hafði fyrir því að ná mér út á lífið enda er ég aldrei þessu vant næstum því viss um að það hefði ekki tekist!

Er aðeins byrjuð að jólast hérna heima. Fór í Ikea og Rúmfó með Klemensi um daginn og keypti aðventuljós, 2 dúka og kerti til að setja á aðventudiskinn. Það verður ekki mikið um skraut í ár en eitthvað smá samt. Ætla að fara að taka stofuna í gegn og setja upp litla tréið mitt og svoleiðis, ætla samt ekki að segja að ég geri það á morgun því þá geri ég það alveg pottþétt ekki á morgun! Jólaði smá til í eldhúsinu í dag, setti dúk á borðið og mandarínur í skál. Eldhúsið er svo lítið að þetta var alveg nóg til að gleðja mig! :) Ætla samt að setja seríu og kannski greni í gluggann líka. Leiðinlegt að það verður allt í drasli inni í svefnherbergi yfir jólin því við höfum ekki efni á kommóðunni fyrr en eftir jól en þá er bara að loka hurðinni og vera fljótur að gleyma! :D Verð reyndar með bókakassa í stofunni líka þangað til eftir áramót en þá á líka að kaupa eina hillu enn. Úff kaupa kaupa kaupa!!!

Fór í yndilsega heimsókn til Dönu og Sverris í gær, Dana tók að s jálfsögðu vel á móti mér og fyllti borðið af góðgæti og ég tróð mig út, var frekar þung á mér þegar ég fór heim. Svo var loksins farið í Bónus í dag og ísskápurinn hálffylltur og geymsluskápurinn troðfylltur. Get nú ekki haft allt tómt þegar ég yfirgef karlinn í næstu viku. Svo hringdi Herdís og við fórum á Vegamót og fengum okkur smá að narta og svo langan jólarúnt alveg út um allt, vesturbæ, Skeljanes, Hafnafjörður og allt þarf á milli. Okkur tókst meira að segja að villast á Völlunum í Hfj, enda auðvelt að ruglast því það er hringtorg á 50 m fresti!! :S

Sit núna bara og hef það gott, hlusta á jólalög og röfla í Gunnarnum mínum, hann er svo þolinmóður þessi elska. Held reyndar að hann heyri e kki helmingin af því sem ég segji, þarf amk oft að segja HA?!?! þegar ég vill fá svar...

...mér er illt í mænunni...
í orðsins fyllstu merkingu, hlýtur að vera lægð yfir Íslandi...eða what ever...!!! Er vöknuð snemma að venju *hóst*, hef reyndar verið að vakna snemma undanfarið en verð svo þreytt á þessu annaðslagið að ég sef í svona sólarhring á milli, er það ekki bara sniðugt?? Jújú. Borðaði súkkulaði rúsínur í morgunmat og það var gott, er á svo miklum túr að ég á það alveg skilið, held að pampers sé málið í dag! Er að bíða eftir að geta farið að vekja manninn minn því ég er að vera einmanna, búin að hanga í tölvunni í 2 tíma. En hann má víst sofa út því fyrirlestrinum í morgun var aflýust, heppni og einmitt þegar ég var búin að vera með rosalega ræðu um að vera duglegur í skólanum. Var að reyna að hringja í múttu mína áðan svo við gætum fengið okkur morgunkaffi saman en hún svaraði bara ekki, hefur örugglega þurft að fara á aukavakt, alltaf nóg að gera í HSA - eldhúsi. Fer alveg að ákveða hvenær ég fer austur, fékk fréttir í gær um að læknirinn sem tók við af lækninum mínum tók ekki við öllum sjúklingunum hans. Hefði kannski verið hægt að láta vita aðeins fyrr því ég er búin að reyna að vera að fá tíma síðan í lok ágúst!!! Svo nú get ég leitað eitthvað annað og þarf ekki að hafa áhyggjur af þessu þegar ég panta flugfarið mitt. Vildi bara óska að Gunnar kæmist með austur en hann ætlar að vera geðveikt duglegur að læra og svo geðveikt duglegur að vinna á jólamarkaðinum hjá Nexus svo hann eigi fyrir fallegum jólapakka handa konunni sinni. Hahahaha skrifaði fyrst fólapakka, ég er líka óttalegt fól...

...þreif hvorki baðherbergið né fór í Bónus í gær sökum magakvala, var bara alveg frá og leið eins og ristillinn væri að reyna að komast út. Frekar óskemmtilegt eitthvað! Í sárabætur bauð Gunnar mér á rúntinn um kvöldið og það var bara hressandi. Ég hlakka til þegar verður komið upp meira af svona fallegu dúlleríi. Verst að geta ekkert skreytt sjálf, bý í niðurgröfnum kjallara en ég held að þau hérna fyrir ofan séu nú eitthvað byrjuð á þessu svo þetta er ekki alveg ónýtt. Ætla samt að reyna að koma upp aðventuljósi ef þetta lága sem ég sá í jólabæklingi Ikea er ennþá til, þessi venjulegu "húsa" aðventuljós eru held ég of stór fyrir gluggana hérna...eða hvað? Var að hækka á ofninum í stofunni, fannst vera orðið eitthvað svo kalt hjá okkur, kannski ekki nema von þar sem það voru mínus 7 þegar ég var úti. Ég er farin að hlakka alveg svakalega til að fara heim um jólin, get varla beðið og langar helst að fara bara á morgun en á móti langar mig ekkert að fara frá honum Gunnari alveg strax. Þetta er snúið! Er samt að hugsa um að vera lengi, kannski svona mánuð, þá hlýtur þessi Seyðisfjarðarþrá aðeins að minnka. Gunnar var reyndar að spurja hvort ég yrði ekki heima þegar við eigum 3ja ára afmæli þann 15.janúar svo kannski er hann að bauka eitthvað karlinn *spennt*. Jæja ennþá rúmur mánuður í það svo það borgar sig ekki að vera að hugsa um það alveg strax. En ég er orðin svo spennt að gefa Gunnari jólagjöfina sína að ég var næstum bara búin að gefa honum hana um daginn, meina er búin að vera með hana í felum síðan í ágúst og núna er ég bara alveg að deyja...

...hef bara ekki farið í vont skap síðan ég bloggaði síðast, hef greinilega skirfað það frá mér! :) Já já þrif og aftur þrif, þetta hefst, geri bara smá í einu en þetta er svo leiðinlegt!! Geri allt nema vaska upp, ég geri það bara ekki! Finn á mér að eitthvað gerist í dag fyrst ég er vöknuð svona snemma, kannski ég taki baðherbergið í gegn, ætti ekki að taka nema svona 10 mínútur. Ég er reyndar ekki vöknuð snemma af því að ég er í góðu skapi eða afþví að ég sjái fram á að gera eitthvað sem þarf að gera í dag heldur vegna þess að ég fékk í magann! :S Vaknaði við þau óskemmtilegheit, ætti að banna svona!!! Sit hérna í keng við tölvuna og þamba sótavatn og vona að allt verði komið í lag fyrir bónusferðina sem er á planinu í eyðunni hans Gunnars eftir hádegi. Jájá lífið er bara bjart í dag þó það sé ennþá dimmt úti. Ætla a ð hringja í pabba og koma honum á óvart með að ég sé vöknuð svona snemma...

...það er hræðilegt ástand á þessu heimili og þá meina ég ekki bara að aðalkarlinn sé lasinn. Það þarf að vaska upp, þvo gólf og baðherbergi, brjóta saman þvott og koma einhverju úr þvottakörfunni í þvottavélina (karfan er meira að segja rifin það er svo mikið í henni, en örvæntið ei, er búin að kaupa nýja). Það þarf líka að skipta á rúminu, henda lakinu (það er rifið ekki svo skítugt að ég haldi að það náist ekki úr), fara í Ikea og kaupa kommóðu svo það sé hægt að ná draslinu upp úr ruslapokum sem það er búið að vera í síðan við fluttum hingað. Fékk hrikalegt geðvonskukast yfir þessu öllu í gær og já það var eftir að ég tók lyfin inn, fór svo bara að grenja og horfði á teiknimyndir eftir að ég hafði sogið upp í nefið og svæft Gunnar. Þessvegna hef ég ekkert gert í dag nema liggja í sófanum með mismikilli meðvitund og hlusta á Ducktales og knúsa Lúlla (ekki pláss fyrir Gunnar í sófanum og svo er hann lasinn). Rétt áðan færði ég stofuborðið og fann hlunka af ló svo að ég verð að fara að gera eitthvað í þessu. En málið er að ég neita að vera sú sem gerir öll heimilisstörfin og allt leit sæmilega út þegar ég fór austur svo Gunnar er skikkaður til að taka þátt en ég hafði það bara ekki í mér að vera að pína hann meðan hann er lasinn, sár og aumur karlgreyið. Og afhverju get ég ekki verið húsleg í mér? Afhverju hef ég ekki gaman að því að sveifla umhverfis mig rökum afþurrkunarklútum og að ríða um á kraftmikilli ryksugunni? Og afhverju geri ég ekki það sem ég hef gaman að eins og dúllast í útsaumi, elda og baka, lesa og spila tölvuspil, hreyfa mig og hitta fólk. Í staðinn sinni ég tveimur áhugamálum alltof mikið og það er að kúra mig undir kærleiksbjarnasænginni minni og horfa á teiknimyndir. Allt er víst gott í hófi!

Svo er það þessi blessaða kommóða sem ég er alltaf að reyna að kaupa, reyndi í byrjun september en þá var liturinn sem ég vildi ekki til í þeirri stærð sem ég vildi. Fékk sms stuttu seinna um að hún væri komin, við brunum frekar löngu seinna í Ikea en engin kommóða og ég varð pirruð yfir að hafa verið svona lengi á leiðinni og misst af henni en nóbbs þá kom upp úr krafsinu að hún hafði aldrei komið, einhver mismerking á gámnum og von á henni eftir 11 vikur. 11 VIKUR!!!! Það er langur tími en ég ákvað að bíða eitthvað lengur en var samt að horfa í krignum mig út um allt eftir annari sem ég mundi falla fyrir. Er semsagt búin að fá sms um að hún sé komin í hús og vitið menn þá á ég ekki pening. Frjáls framlög vegna kommóðukaupa velþegin.

Ég er pirruð við Ikea og pirruð við sjálfa mig og pirruð yfir að svona fáir kommenti á bloggið mitt þó að þónokkrir virðirst skoða það á hverjum degi og pirruð yfir látunum í ísskápnum sem byrjuðu um daginn og bara PIRRUÐ yfir höfuð og það er engum að kenna akkúrat núna, er ekki einu sinni búin að taka inn lyfin í dag! Best að vinda sér í það og vona það besta, sem betur fer fyrir Gunnar er hann sofnaður...

...veit ekki hvernig veður er í Reykjavíkinni því ég hef ekki kíkt út um gluggann síðan ég kom á fimmtudaginn. Gunnar var með allt dregið fyrir og það hefur passað skapvonskunni minni ágætlega. Var hálf lasin þegar ég kom og hélt nú að það yrði komið í lag fyrir laugardag en neibbs var slöpp og öfugsnúin sem aldrei fyrr. Ef ég hefði vitað þetta hefði ég nú stoppað aðeins lengur heima hjá mömmu og látið hana hugsa um mig. Gunnar heldur að skapvonskan sé vegna lyfjanna sem ég var að fá aftur eftir smá hlé, segir að ég hafi verið svona líka þegar ég byrjaði á þeim guð má vita hvenær, rúmlega mánaðar hlé og allt aftur á byrjunarreit. Missti af dilissíus kjúllasúpunni hans Klemensar og Páls Óskars-djammi á Nasa og það gerir mig ekkert betri í skapinu!!! *ARG*

Annars er mig farið að langa til að föndra eftir að hafa skoðað og lesið bloggið hennar Gúu Jónu, hún lætur þetta virka svo auðvelt, bara *vifff* og þá er búið að töfra fram sokka og kramarhús eins og ekkert sé. Mann fer líka að langa til að innrétta allt upp á nýtt en hérna eru hvorki góðir flóamarkaðir né peningar í veskinu til að gera eitthvað þannig. Held reyndar að allsherjar þrif myndi gera helling fyrir útlitið því Gunnar var ekki að hafa áhyggjur af svoleiðis smotteríi meðan ég var í burtu! Mig langar líka að fara að gera smá jólalegt hjá mér en hugsa að ég bíði með að setja upp litla tréið mitt þar til 1.des. Vildi að ég gæti sett upp stóra tréið mitt og allt fallega skrautið sem ég á á Seyðisfirði. Svo sem ekkert vandamál að setja það upp, vandamálið er hvar það ætti að geyma það þegar jólin eru búin. Kannski svolítið dýrt að vera að senda það fram og til baka fyrir nokkra daga...

...jæja mín bara sest við skirftir eftir langt hlé. Ástæðan hefur ekki verið leti eða að ég hafi ekki haft neitt að segja heldur netleysi. Já búið að vera heldur betur bras á þessu hjá okkur, línan vitlaus tengd hjá köllunum, síminn og rhí sendu okkur fram og til baka og svo voru ráderarnir eitthvað að stríða okkur en núna er þetta alveg að koma, vonandi meira að segja fyrir helgina bara. Ástæðan fyrir að ég get bloggað núna er sú að ég blikkað ofurfallega til pabba, sem brosti til mömmu sem tók upp visa kortið og þess vegna er ég bara á Seyðsifirði og ætla að stoppa í svona viku. Hef reyndar tilkynnt Gunnar að ég komi ekki heim fyrr en það verði búið að vaska upp. Ég hata að vaska upp, hata það meira en að ryksuga, og núna er vaskurinn yfirfullur og hálf pizza þar í þokkabót. Var að reyna að bjarga kotasælunni frá vísum dauðdaga og pizzan datt í vaskinn og hengdi sig á kranann. Mjög smekklegt.

Smá fréttir af íbúðinni, hún er 45 m2, lágt til lofts, ljós og létt með sjálfskúrandi eldhúsgólfi, ekki allir með svoleiðis sko!! Svo er fallegur rauður póstkassi fyrir utan sem kemur aldrei neinn póstur í. Það er reyndar gólfkuldi því allt er flísalagt en inniskórnir sem ég fékk í jólagjöf frá tengdó í fyrra hafa alveg reddað mér. Ef ég læt laga myndaalbúmið í tölvunni minni get ég kannski tæmt myndavélina og þá tekið myndir og sett inn en ég lofa engu því hjá mér tekur allt sinn tíma....og hvaða tími er núna? Jólagjafatími!!! Ég er alltaf að pæla og spegúlera í jólagjöfum, búin að ákveða sumar og kaupa þrjár. Er reyndar ekki farin að hlusta á jóllög eins og frænka mín á Landamótum, reyni að sleppa því þangað til í desember svona til að æra ekki aðra en ég er voðalega hrifin af jóladótinu sem er komið í búðirnar og jólaljósin, það er farið að hengja upp jólaljós!! :)

En held að ég sé komin með ritræpu, svo ég segji þetta bara gott. Vona að fólk hafi ekki alveg gefist upp á að kíkja hingað inn, þangað til næst...